我ê頭一个YouTube頻道
其實有用台文ê YouTube頻道是不止仔濟,凡勢mā會使講是無欠我一个,毋過我認為猶是愛經營家己ê一群迷眾(英語所講ê fans), 按呢若欲動員啥物行動,抑是欲宣傳新創作攏較利便。
我的頭一个台語YouTube頻道原底號做台語自在區 (自在區是我對Comfort Zone翻譯過來ê),to̍h是為著想欲來起造一个「予台語人毋免切做其他語言」ê自在區,才想講欲拍一堆台語影片,予台語人通提來做消遣。毋過彼陣對YouTube經營較無了解,所以其實攏是teh烏白創,尾仔我感覺做了較有效果ê是一个號做「你敢知影」ê冷智識系列,致使我落尾共其他ê影片攏刣去ah,mā規氣kā頻道ê名改做你敢知影(最近有按算欲重新開始更新)。
(歹勢,彼陣ê mài-khù 音質較䆀)
做YouTube愛知影ê鋩角
拄仔開始想欲做YouTube,干焦是先有一个想法、一个動機,毋過我發現,其實鋩角ê重要性是無較輸動機。
我這段時間所學著ê鋩角主要有三項,我佇遮小整理予逐家罔參考:
愛知影平台有演算法
坦白講,咱做YouTube無可能毋去考慮流量,to̍h算毋是以趁錢做目的,咱應該mā是希望家己會當有一寡影響力,通好對社會造成家己所向望ê影響。所以咱to̍h愛認捌著演算法這號物件,而且to̍h kā伊好好仔利用。若無,咱創作ê內容一定會予濟濟「別人用心針對演算法設計過ê內容」淹過,按呢to̍h有影無彩。
不而過,演算法是定定teh調整,而且通常攏無蓋透明ê,所以到底愛按怎做才會去受著演算法上大力ê推捒?這to̍h無一个標準、永遠袂變ê答案。毋過,猶是有幾个大方向會使去思考,這幾項若有顧慮著,通常to̍h袂差蓋遠ah。
◎主題袂使傷濟:仝一个頻道內,逐支影片ê主題愈相關,YouTube會愈去推薦你ê頻道。若準真正有幾若ê主題想欲做,建議是拆做無仝頻道去經營較好。
◎更新頻率愛穩定:聽講YouTube較會去推捒有捷teh更新ê頻道,雖然我無法度確定這敢是誠實ê,毋過若是會使固定佇逐禮拜ê某一工出新片,mā會使培養觀眾ê習慣,予in佇固定ê時間隨看新片,按呢對推捒mā真有幫助。
◎影片本身愛予人願意看予了:其實,毋管用啥物步數,上重要ê猶是內容本身ê品質佮價值。若是你ê影片予人看三秒to̍h關掉,按呢YouTube mā會判斷這是無好ê影片,對推捒to̍h真不利。
愛kā頻道ê受眾(Target Audience)設定予清楚
咱無可能用仝一个頻道去滿足著所有ê人,比論講咱若欲佮國中生開講,使用ê詞彙佮選擇ê話題,to̍h無可能和佮咱ê爸母講話仝款。所以咱teh開始經營頻道進前,愛先kā頻道ê受眾決定予好,比論講「你敢知影」主要to̍h是做予較慣勢使用台文ê人看ê,所以我ê字幕、標題全攏是做台文,mā袂有任何華語內容。毋過「陳火舌」這个頻道to̍h較倚「予台語初學者會當來鬥陣開講、鬥陣耍」,所以遐ê影片/直播標題定定是台文佮華文濫做伙,甚至mā有寫華語歌( 內底原仔mā是愛偷khǹg兩个台語詞 )。
愛有家己ê人物設定
咱人類ê頭腦足愛貼標籤,雖然聽起來毋是啥毋好代,毋過這to̍h是人類ê天性。對咱來講,較簡化、較明顯ê人物個性總--是較好理解,所以濟濟YouTuber其實攏會kā家己ê情緒刁工做予較大、較譀,按呢觀眾較有法度kā你記牢牢。
我家己teh鏡頭頭前佮平時仔to̍h無啥仝。我私底下其實對生份人較閉思,政治立場mā誠分明(會kā人歹ê彼種XD) ,毋過這毋是我欲予觀眾看著ê形象,所以我會刁工kā較三八、較好笑ê一面敨放佇鏡頭前,mā會kā較歹聲嗽ê部份藏予好。
想欲愛有,毋過火舌無氣力/無才調做ê頻道主題
其實mā毋是啥物真了不起ê代誌,我to̍h干焦「看著別種語言有人teh做,希望有一工mā會使看著有人用台灣話來做」按呢爾爾。總--是心肝內有一份清單,分享一下mā無啥物敗害,若是有想欲鬥陣來用台語創作ê人,凡勢mā會使對遮得著一寡想法hoⁿh?
畫妝 (教學也好,單純記錄畫妝過程兼開講也好)
SMOSH彼種趣味短劇
科學史
教人煮食
生產力 (productivity)
開箱
投資
講古 (若像恐怖ê較時行? )
歡迎推薦
若是有知影啥物袂䆀ê台語頻道,mā誠歡迎你回批、留話推薦予我!
當然,若準你mā想欲開始用台灣話創作,mā誠歡迎佮我分享想法,咱會使鬥陣交流、同齊探討。
後擺,咱來講陳火舌頻道原底ê計畫,佮一寡較幼ê設計理念。
煮食這部份Monet算是有咧做?
有當時仔嘛會佇伊hia討論一寡煮食ê詞欲按怎用